وہ آخری چند دن دسمبر کے

وہ آخری چند دن دسمبر کے

ہر برس ہی گِراں گزرتے ہیں

خواہشوں کے نگار خانے سے

کیسے کیسے گُماں گزرتے ہیں

رفتگاں کے بکھرے سایوں کی

ایک محفل سی دل میں سجتی ہے

فون کی ڈائری کے صفحوں سے

کتنے نمبر پکارتے ہیں مجھے

جن سے مربوط بے نوا گھنٹی

اب فقط میرے دل میں بجتی ہے

کس قدر پیارے پیارے ناموں پر

رینگتی بدنُما لکیریں سی

میری آنکھوں میں پھیل جاتی ہیں

دوریاں دائرے بناتی ہیں

نام جو کٹ گئے ہیں اُن کے حرف

ایسے کاغذ پہ پھیل جاتے ہیں

حادثے کے مقام پر جیسے

خون کے سوکھے نشانوں پر

چاک سے لائینیں لگاتے ہیں

پھر دسمبر کے آخری دن ہیں

ہر برس کی طرح سے اب کے بھی

ڈائری ایک سوال کرتی ہے

کیا خبر اس برس کے آخر تک

میرے ان بے چراغ صفحوں سے

کتنے ہی نام کٹ گئے ہونگے

کتنے نمبر بکھر کے رستوں میں

گردِ ماضی سے اٹ گئے ہونگے

خاک کی ڈھیریوں کے دامن میں

کتنے طوفان سِمٹ گئے ہونگے

ہر دسمبر میں سوچتا ہوں میں

اک دن اس طرح بھی ہونا ہے

رنگ کو روشنی میں کھونا ہے

اپنے اپنے گھروں میں رکھی ہوئی

ڈائری دوست دیکھتے ہونگے

اُن کی آنکھوں کے خواب دنوں میں

ایک صحرا سا پھیلتا ہوگا

اور کچھ بے نِشاں صفحوں سے

نام میرا بھی کٹ گیا ہوگا

امجد اسلام امجد

تلاش

میں کب سے اپنی تلاش میں ہوں، ملا نہیں ہوں

سوال یہ ہے کہ میں کہیں ہوں بھی، یا نہیں ہوں

یہ میرے ہونے اور نہ ہونے سے منکشف ہے

کہ رزمِ ہستی میں کیا ہوں میں اور کیا نہیں ہوں

میں شب نژادوں میں صبحِ فردا کی آرزو ہوں

میں اپنے امکاں میں روشنی ہوں، صبا نہیں ہوں

گلاب کی طرح عشق میرا مہک رہا ہے

مگر ابھی اس کی کشتِ دل میں کھلا نہیں ہوں

نجانے کتنے خداؤں کے درمیاں ہوں، لیکن

ابھی میں اپنے ہی حال میں ہوں، خدا نہیں ہوں

کبھی تو اقبال مند ہوگی مری محبت

نہیں ہے امکاں کوئی مگر، مانتا نہیں ہوں

ہواؤں کی دسترس میں کب ہوں جو بُجھ رہوں گا

میں استعارہ ہوں روشنی کا، دیا نہیں ہوں

نہیں اس خرابات میں اذنِ لغزش

یہ دنیا ہے اے قلبِ مضطر سنبھل

مجید امجد

خاموشی

یہ خاموشی جو ،اب کے گفتگو کے بیچ ٹھہری ہے
یہی اک بات، ساری گفتگو میں سب سے گہری ہے

ہر قدم مرحلہ ء دار و صلیب آج بھی ہے......ساحرلدھیانوی

ہر قدم مرحلہ ء دار و صلیب آج بھی ہے
جو کبھی تھا وہی انساں کا نصیب آج بھی ہے

جگمگاتے ہیں اُفق پر یہ ستارے لیکن 
راستہ منزلِ ہستی کا مہیب آج بھی ہے

سرِ مقتل جنھیں جانا تھا وہ جا بھی پہنچے
سرِ منبر کوئی محتا ط خطیب آج بھی ہے

یہ تیری یاد ہے یا میری اذیت کوشی
ایک نشتر سارگِ جاں کے قریب آج بھی ہے

کون جانے یہ تیرا شاعرِ آشفتہ مزاج
کتنے مغرور خداوں کا رقیب آج بھی ہے

ساحرلدھیانوی

یہ فخر تو حاصل ہے, برے ہیں کہ بھلےہیں.......ادا جعفری

یہ فخر تو حاصل ہے, برے ہیں کہ بھلےہیں
دو چار قدم ہم بھی تیرےساتھ چلے ہیں

جلنا تو چراغوں کا مقدر ہے ازل سے
پہ دل کے کنول ہیں کہ بجھے ہیں نہ جلے ہيں

تھے کتنے ستارے کہ سرشام ہی ڈوبے
ہنگام سحر کتنے ہی خورشید ڈھلے ہیں

جو جھیل گۓ ہنس کے کڑی دھوپ کے تیور
تاروں کی خنک چھاؤں میں وه لوگ جلے ہیں

ایک شمع بجھائی تو کئی اور جلالیں
ہم گردش دوراں سے بڑی چال چلے ہیں

ادا جعفری

بہت پہلے سے ان قدموں کی آہٹ جان لیتے ہیں

بہت پہلے سے ان قدموں کی آہٹ جان لیتے ہیں
تجھے اے زندگی ہم دور سے پہچان لیتے ہیں

طبیعت اپنی گھبراتی ہے جب سنسان راتوں میں
ہم ایسے میں تری یادوں کی چادر تان لیتے ہیں

مری نظریں بھی ایسے قاتلوں کا جان و ایماں ہیں
نگاہیں ملتے ہی جو جان اور ایمان لیتے ہیں

فراق اکثر بدل کر بھیس ملتا ہے کوئی کافر
کبھی ہم جان لیتے ہیں کبھی پہچان لیتے ہیں

عمر لمبی ہے

دشمنوں کی محفل میں سازش ہو رہی تھی میرے قتل کی
ہم اچانک پہنچے تو بولے, یا ر تیری عمر لمبی ہے

ہنسنے والے اب ایک کام کریں
جشنِ گریہ کا اہتمام کریں

ہم بھی کر لیں جو روشنی گھر میں
پھر اندھیرے کہاں قیام کریں

مجھ کو محرومیِ نظارہ قبول مگر
آپ جلوے نہ اپنے عام کریں

اک گزارش ہے حضرت ناصح
آپ اب اور کوئی کام کریں

آ چلیں اس کے در پہ اب اے دل
زندگی کا سفر تمام کریں

ہاتھ ہٹتا نہیں ہے دل سے خمار
ہم انہیں کس طرح سلام کریں

خمار بارہ بنکوی

تن اُجلا من میلا , سادھو نام انیک
اس سے کالا کوّا بھلا , جو اندر باہر ایک

عادت ہی بنا لی ہے
اس شہر کے لوگوں نے
انداز بدل لینا
آواز بدل لینا
دنیا کی محبت میں
اطوار بدل لینا
موسم جو نیا آئے
رفتار بدل لینا
اغیار وہی رکھنا
احباب بدل لینا