یہ جفائے غم کا چارہ ، وہ نَجات دل کا عالم........ فیض احمد فیض

یہ جفائے غم کا چارہ ، وہ نَجات دل کا عالم

ترا حُسن دستِ عیسیٰ ، تری یاد رُوئے مریم

دل و جاں فدائے راہے کبھی آکے دیکھ ہمدم

سرِ کوئے دل فگاراں شبِ آرزو کا عالم

تری دِید سے سوا ہے ترے شوق میں بہاراں

وہ چمن جہاں گِری ہے ترے گیسوؤں کی شبنم

یہ عجب قیامتیں ہیں تری رہگزر میں گزراں

نہ ہُوا کہ مَرمِٹیں ہم ، نہ ہُوا کہ جی اُٹھیں ہم

لو سُنی گئی ہماری ، یُوں پِھرے ہیں دن کہ پھر سے

وہی گوشۂ قفس ہے ، وہی فصلِ گُل کا ماتم

ہم سادہ ہی ایسے تھے، کی یوں ہی پذیرائی....... فیض احمد فیض

ہم سادہ ہی ایسے تھے، کی یوں ہی پذیرائی

جس بار خزاں آئی، سمجھے کہ بہار آئی

آشوبِ نظر سے کی ہم نے چمن آرائی

جو شے بھی نظر آئی، گل رنگ نظر آئی

امیدِ تلطف میں‌ رنجیدہ رہے دونوں

تو اور تری محفل، میں اور مری تنہائی

یک جان نہ ہو سکیے، انجان نہ بن سکیے

یوں ٹوٹ گئی دل میں‌ شمشیرِ شناسائی

اس تن کی طرف دیکھو جو قتل گہِ دل ہے

کیا رکھا ہے مقتل میں ، اے چشمِ تماشائی

سبھی کچھ ہے تیرا دیا ہوا، سبھی راحتیں، سبھی کلفتیں.......فیض احمد فیض

سبھی کچھ ہے تیرا دیا ہوا، سبھی راحتیں، سبھی کلفتیں

کبھی صحبتیں، کبھی فرقتیں، کبھی دوریاں، کبھی قربتیں

یہ سخن جو ہم نے رقم کیے، یہ ہیں سب ورق تری یاد کے

کوئی لمحہ صبحِ وصال کا، کئی شامِ ہجر کی مدّتیں

جو تمہاری مان لیں ناصحا، تو رہے گا دامنِ دل میں کیا

نہ کسی عدو کی عداوتیں، نہ کسی صنم کی مروّتیں

چلو آؤ تم کو دکھائیں ہم، جو بچا ہے مقتلِ شہر میں

یہ مزار اہلِ صفا کے ہیں، یہ ہیں اہلِ صدق کی تربتیں

مری جان آج کا غم نہ کر، کہ نہ جانے کاتبِ وقت نے

کسی اپنے کل میں بھی بھول کر، کہیں لکھ رکھی ہوں مسرّتیں

وقت کے پار جا سکو تو سنو

وقت کے پار جا سکو تو سنو

میرے کچھ لوگ وہاں رہتے ہیں

ان سے کہنا بہت اداس ہوں میں 

ان سے کہنا یہ دل نہیں لگتا 

ان سے کہنا بہت اکیلی ہوں

ان سے کہنا میں رویا کرتی ہوں

ان سے کہنا مجھے قرار نہیں 

ان سے کہنا ہے انتظار بہت 

ان سے کہنا وہ مجھ سے بات کریں 

ان سے کہنا زبان سوکھ گئی

ان سے کہنا کلام باقی ہے 

ان سے کہنا میری یہ دو آنکھیں 

ان سے کہنا ترس گئیں ان کو 

ان سے کہنا وہ اب ملیں مجھ سے 

ان سے کہنا مجھے بلائیں کبھی 

وقت کے پار جا سکو تو سنو

میرے کچھ لوگ وہاں رہتے ہیں

جی میں آتا ہے الٹ دیں انکےچہرے سے نقاب....... ساغر صدیقی

ایک وعدہ ہے کسی کا جو وفا ہوتا نہیں

ورنہ ان تاروں بھری راتوں میں کیا ہوتا نہیں

جی میں آتا ہے الٹ دیں انکےچہرے سے نقاب

حوصلہ کرتے ہیں لیکن حوصلہ ہوتا نہیں

شمع جس کی آبرو پر جان دے دے جھوم کر

وہ پتنگا جل تو جاتا ہے فنا ہوتا نہیں

اب تو مدت سے رہ و رسمِ نظارہ بند ہے

اب تو ان کا طُور پر بھی سامنا ہوتا نہیں

ہر شناور کو نہیں ملتا تلاطم سے خراج

ہر سفینے کا محافظ ناخدا ہوتا نہیں

ہر بھکاری پا نہیں سکتا مقامِ خواجگی

ہر کس و ناکس کو تیرا غم عطا ہوتا نہیں

ہائے یہ بیگانگی اپنی نہیں مجھ کو خبر

ہائے یہ عالم کہ تُو دل سے جُدا ہوتا نہیں

بارہا دیکھا ہے ساغر رہگذارِ عشق میں

کارواں کے ساتھ اکثر رہنما ہوتا نہیں